Бишкекте 2025-жылдын 20-мартында саат 19:00дө Усубалиев аянтында (Эски аянт) футбол күйөрмандары үчүн коноктогу «Өзбекстан — Кыргызстан» беттешин көрүү үчүн ачык асман алдындагы фан зонасы уюштурулат. Бул тууралуу муниципалитеттин басма сөз кызматы билдирди.
Маалыматка ылайык, шаар тургундарына жана борбор калаанын конокторуна кыргыз эстрада жылдыздарынын катышуусундагы чоң шоу-программа тартууланат. Иш-чараны Бишкек шаарынын мэриясы Кыргызстандын футбол биримдиги жана өнөктөштөрү менен биргеликте уюштурган.
Борбор калаанын мэриясы бардык шаар тургундарын Кыргызстандын курама командасын колдоп, оюн-зоок кечесин пикирлештер менен бирге өткөрүүгө чакырат.
Иш-чарага кирүү акысыз, фан зонасы саат 19:00дө ачылат, беттеш 22:00дө башталат.
Эске салсак, Кыргызстан курама командасы Ташкентте Өзбекстандын командасы менен беттешсе, 25-мартта Бишкекте Катардын футболчулары менен беттешет.
