«Манас» эл аралык аэропорту өзүнүн өнүгүүсүнүн маанилүү этабына даярданууда. Жүргүнчүлөрдү тейлөөнүн ыңгайлуулугун жана сапатын жогорулатууга багытталган аэропорт комплексин масштабдуу реконструкциялоо жакынкы аралыкта башталат. Бул тууралуу аэропорттун басма сөз кызматы билдирди.
Учурда аэропорттун инфраструктурасы болжол менен 39 миң чарчы метр аянтты ээлейт. Алдыдагы жумуштардын убагында комплекс кошумча турде 18 миң чарчы метрге кеңейтилет. Бул жүргүнчүлөр үчүн шарттарды бир топ жакшыртат жана терминалдардын ишин оптималдаштырат.
Реконструкциялоонун алкагында каттоо пункттарынын санын көбөйтүү, күтүү зонасын кеңейтүү, заманбап эс алуу жана тамактануу жайларын түзүү пландаштырылууда. Ошондой эле аэропорттун натыйжалуулугун жана кардарлардын тажрыйбасын жакшыртуу үчүн жаңы технологиялык чечимдер киргизилет.
Модернизациянын негизги элементтеринин бири аэропорттун негизги имараттарын бириктире турган заманбап skywalk — жабык өтмөк куруу болот. Бул ыңгайлуу коридор жүргүнчүлөрдү аба ырайынан коргоону камсыздайт жана терминалдар арасында тезирээк өтүүгө мүмкүндүк берет.
